隔牆有耳：節目煮翅幟哥被斥

無綫 9月 4日晚播出名廚黃永幟做主持嘅飲食節目《為食總司令》，幟哥喺節目尾段親自下廚示範煮菜式「炒蟹肉乾撈翅」畀嘉賓惠英紅同鍾慧冰品嚐，用咗重量級海虎翅做食材，仲講解點樣煮魚翅，成班人食得津津有味，但節目出街後無綫即刻收到 4個電郵同一個電話投訴，話幟哥行為鼓吹食翅好唔環保，其中一個投訴嚟自 WWF世界自然基金會。
無綫外事部副總監曾醒明噚日解釋節目只係介紹美食資訊，冇鼓吹人食翅，會將意見向製作部反映，日內書面回覆有關團體，幟哥就話暫時唔回應。其實幟哥被投訴有前科，舊年佢主持第一輯《為》節目時亦推介過魚翅菜式，當時同樣被環保團體同網民投訴㗎。